Gaya-gaya nga ba?

ni F.E. Zarate

Noong isang araw, bigla kong naisipang manonood ako ng telebisyon upang makapagpahinga naman sa pagod na nararanasan ko kakaaral. Naghahanap ako ng palabas na maaari kong panoorin, ngunit hindi ako makapili kaagad kaya palipat-lipat ako ng estasyon.

Napadaan ako sa MYX, isang estasyon na nagpapalabas ng mga music video ng mga mang-aawit mula dito sa Pilipinas at sa ibang bansa. Napatigil ako sa paglilipat ng estasyon dahil nakatawag ng aking pansin ang ipinapalabas nilang music video ng mga sandaling iyon.

Ipinapalabas sa MYX ang music video ng isang grupo na kinabibilangan ng limang Pilipina na teenager din tulad ko. Nakasuot sila ng makukulay na damit habang kumakanta at sumasayaw. Sa panood ko ang music video nila, napaisip ako kung bakit parang pamilyar ang nakikita ko kahit hindi ko kilala ang mga umaawit sa music video na iyon. Malamang ay bago pa lamang sila sa industriya ng musika sa bansa, ngunit ang konsepto ng kanilang music video, pati ang tono ng kanta at hindi bago sa akin.

Agad sumagi sa aking isipan ang mga music video ng mga kinahihiligan kong mang-aawit sa Korea. Tila ginagaya sila ng grupo ng mang-aawit na nasa telebisyon noon. Nalaman ko na Pop Girls ang tawag sa grupong iyon at “Crazy, Crazy” ang pamagat ng awit nila. Sa music video nila, silid-aralan ang tagpuan. Nakabihis ang mga mang-aawit ng mga unipormeng pampaaralan. Nang magsimulang umawit ang grupo, naging entablado ang tagpuan at napalitan ng makukulay na damit ang mga suot nilang uniporme.

Magkatulad din ang tono ng kanta ng Pop Girls sa kanta ng mga mang-aawit sa Korea. Kinakanta ang bahagi ng koro ng kanta sa wikang Ingles at paulit-ulit itong binabanggit sa buong kanta, samantalang nasa orihinal na wika naman ng mga mang-aawit ang iba pang mga berso. Naalala ko ang grupong After School at Wonder Girls mula sa Korea. Halos ganito rin kasi ang nasa mga music video nila tulad ng “Ah!” ng After School at “Tell Me” ng Wonder Girls. Gayang-gaya ng Pop Girls ang lahat maliban sa nasyonalidad.

Hindi ito ang unang pagkakataong makakita ako ng produktong Pilipino na ginaya sa mga produkto ng ibang bansa. Tila nasasanay na ang mga Pilipino sa pangongopya ng produkto ng iba. Bakit nga ba tayo naging ganito? Wala bang tiwala ang mga Pilipino sa sarili nilang kakayahang lumikha ng produktong orihinal?

Marami ang nagsasabi na epekto pa rin ng colonial mentality and pagpili ng mga Pilipino sa mga produktong gawa sa ibang bansa sa halip na mga produktong dito sa Pilipinas ginawa. Dahil sinakop ng mga banyaga ang ating bansa sa higit na tatlong daang taon, maaaring nakasanayan ng mga Pilipino ang pagiging mas mataas ng mga banyaga sa lipunan lalo na noong panahon ng mga Kastila at mga Hapon kung saan itinuturing mga mangmang ang mga Pilipino. Nasanay ang karamihan sa mga Pilipino noon na maging sunud-sunuran ng mga dayuhan. Tumatak sa isip ng mga tipikal na Pilipino na higit na magaling ang mga banyaga at higit na maganda ang kanilang mga produkto.

Ilang panahon na ang nakalilipas mula noong sinakop ang Pilipinas ngunit napakalakas pa rin ng impluwensiya ng mga banyagang bansa sa Pilipinas. May pag-iisip pa rin ang mga Pilipino na maganda ang kalidad ng lahat ng produkto ng mga dayuhan at alam nilang tatangkilikin at kahihiligan ito ng ibang mga Pilipino kaya ang mga produkto ng mga dayuhan na lamang ang nais nilang gayahin.

Takot mabigo ang karamihan sa mga Pilipino na gumagawa ng mga negosyo. Kung gagawa sila ng panibagong produkto, maaaring hindi ito pansinin ng ibang mga Pilipino dahil produkto ng mga dayuhan ang gusto nila. Dahilan ito kung bakit ginagaya na lamang nila ang produktong gawa sa ibang bansa.

Halimbawa nito ang ilang mga palabas sa telebisyon. Ginaya lamang mula sa game shows ng mga dayuhan ang karamihan sa mga game shows na ipinapalabas dito sa Pilipinas tulad ng Who Wants to be a Millionaire, Deal or no Deal at Hole in the Wall. Isa pang halimbawa ang mga teleserye ng mga Koreano, Hapon o Intsik tulad ng Full House, Lovers in Paris at My Girl. Gumagawa ang mga Pilipino ng sarili nilang bersyon nito, ngunit binabago nila nang kaunti ang takbo ng kuwento.

"Game show" ng mga dayuhan na may "Philippine version"

Hindi nangangahulugan na walang sariling kakayahan and mga Pilipino na maging matagumpay lalo na sa paggawa ng sariling produkto. Sa katunayan, unti-unti nang nakikilala ang mga produkto ng mangilan-ilang Pilipino na nagsisikap na magtatag ng sarili nilang pangalan. Isang halimbawa na nito si Tina Maristela Ocampo. Sikat siya bilang tagadisenyo ng mga evening bag. Isandaang pursiyentong gawa ng Pilipino ang mga bag niya at ang kagulat-gulat dito, mga dayuhan ang tumatangkilik dito. Dapat siyang magsilbing inspirasyon at mabuting huwaran sa mga Pilipino. Napatunayan niya na kaya ng mga Pilipino magtagumpay sa sarili nilang kakayahan at hindi sa pangongopya sa produkto ng mga banyaga.

Sanggunian:

http://emanila.com/philippines/2010/01/19/colonial-mentality/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: